SAC Sektion Zermatt

Tüürubricht

Breuiljoch, 6. Merze 2011 → Fotos

Tüüruleiter:
Kari Schmidhalter
Teilnäämer:
Annette Steger, Edy Biner, Desirée Bayard, Philippe Mooser, Sandro Perren, Priska Thalmann

Schtâlblâwa Himmel ìm Bìz Nord-Oschtwind, mit däm Wätter­bricht träffe wer iisch ze halbe Niine uf dr Schlüe­matta. Bis zem Trochchne Stäg chôme wer mit de Gondle güet vorwärts, de aber hei wer ìs Verbindigs­problem. Dr Lift uf dì Teschta fârt erscht iner Viertel­schtund. Also beitu wer emmel. Darfer sii wer d erschtu uf dr Teschta und chenne uber d frisch gmachtu Piste uf Plan Maison churz­schwinge oder kârvu. Ufem Sässellift Banccheron geits de etlich Höjumeter ìmüüf. Fan dr Bärg­schtazìo bis da wa wer d Fäll montiere, tient d Rutschine wa fan de Tschugge sind ìmbrìcha chô und dr verblâse Schnee iischì Ober­scheiche rächt massiere. Gmietlich gee wer dì füüf-säggsch­hundert Höjumeter ds Täli verìì und ìmbrüüf uf ds Breuil­joch. Herrlichi Luft, feina Sunnu­schii, äs chenntì nid weecher sii. Zobruscht ìm Joch aber blâsts eis fascht ì wäg, äbe Nordwind. Appas triiche, appas ässe und schô fârt dr Kari iisch alle, nei fascht alle, um d Ôre. Numma dr Sandro magmu schtand­ghalte. Schii schwingend d Heng ìmbrì, ganz eifach zem züelüege. Wier anru miesse etlich mâl gschtelle und schnüüfu. Dì Pumpa pollut nid numma mier. Aber mit mee oder weniger Mie schaffe wer allì d Abfârt uber Pulver, Bruch­hârscht und Sulz ìmab uf Cervinia. Hie beitut schìsch dr Biner Fons und hed uf dr Terass fam «Crettaz» fer iisch allì ìn flotta Tisch reserviert. Lardo, Wii, Sunna, Palänta, Lasania, Tiramisu, Espresso, eifach numma no Gnuss. Herrlichi Läbensfreid.

Merci Kari fer där fantastisch Tag.

Bricht: Priska
Foto: Philippe

Breuiljoch: